我發覺我真係好懶，想寫但懶去寫blog，呢個blog無乜邊幾個fd知，咁就寫下自己d野啦，可以唔使比d唔知呢個blog既朋友睇到，發泄下都好.....

點解我每逢遇上感情問題都唔如意?

我錯響邊? 自問自己唔係壞人，點解我鍾意一個我唔應該鍾意既人?

點解佢咁好人呀? 唔好對我咁好~ 

我覺得我好白痴好低能好on居，好討厭自己咁易鍾意人，令自己咁辛苦~

我好想喊~~好想話比fd知，但果個人佢地都識，我唔可以話佢地知呀~我會好樣衰架~

我唔想成日鍾意人，搵人鍾意下我好無呀??

星期六匆匆忙忙咁收工，我就大把野未做完就要熄電腦，成張枱d野都未執就趕住走，我地今次去澳門就坐新開既船，響氹仔落船架~不過架船係新同埋闊，不過我覺得個座位一d都唔好坐，想訓都訓唔到。

去到氹仔仲諗住可以去氹仔食野掃街，點知，佢地大部份人都鍾意去賭場，成日掛住賭，一過左關就去威尼斯人，仲有得半日時間，真係唔係好夠時間，我地呢個旅程首先每人夾一千，將其中三千攞黎博一鋪，就博到返黎，就嬴個飯錢返黎!我就唔係太鍾意賭，又唔識，但係個個都玩，所以自己都攞左五百出黎玩百家樂，嬴下輸下咁，原本輸淨二百，跟住我就將呢二百比我經理幫我玩，搭佢一齊落注，一百一百咁嬴返，最後就嬴左一百就算lu，就將呢一百買手信。

之後去左媽閣廟附近出名既船屋葡國餐廳食晚飯，不過我就覺得除左海鮮湯+豬仔包好味之外，全部都麻麻地，仲特登訂左隻燒乳豬，以為有幾好食，點知都係得個咸字，中式乳豬好味好多~~全餐d野都勁咸，認真麻麻地~

食完餐飯就9點幾，當然係買下手信啦~買完手信......又係賭......佢地真係好爛賭，我諗佢地黎既主要目的十成係想"賭"，去到經過永利，不過無入去，響門口有個好大既噴水池，原來噴到好高，仲曉噴火，加埋d music都幾靚幾好睇。

睇完就去左Sands，去到就要買左Turbo Jet船飛返HK，佢地原本想買3:00am，我同個同事都唔想玩咁耐，又唔係出去玩，響度咁多個鐘都係賭，悶死攰死眼訓死，所以我地就想搭11:30pm走，不過最終原來只有11:40pm同埋尾班12:15am，無謂爭少少就分開走，所以我地齊齊買尾班飛。

呢個賭場入面超焗，無冷氣咁，我同個同事唔想再賭，就去左睇下d人跳舞，跟住就去玩老虎機無咁悶，我就入左一百蚊玩，禁左幾次就贏左6百幾，勁開心，但係剛剛先開始，有排都未走得，所以繼續玩，變返4百幾，之後玩玩下又有Jetpo 8次，哈哈~~~又羸返5百幾，我當然見好就收，就攞錢無玩lu，我完全無諗過玩老虎機都會嬴錢，由一百變5百幾，我諗住攞一百出黎玩下就算，因為我從來玩老虎機都無嬴錢，我真係超開心，果日總共羸6百幾，即係除左買手信唔使出錢之外，船飛都嬴返黎，人地話第一次賭既人多數都嬴，因為d爛賭鬼唔認得你，哈哈~我覺得我果日好好彩，下次我諗無咁好彩~雖然幾百蚊唔係多，不過由無變有，都已經好好，起碼呢個旅程即係唔使錢~

我終於都明白點解d人咁爛賭，因為個吸引力好大，講真，我今次有d運，我都想下次再去玩下，不過，人唔會成日咁好運，我覺得嬴同輸都好易~我下次玩都一樣會比個底線自己，諗住攞一個金額玩，有既就當然好，無既咪當玩下囉~去博下船飛返黎已經夠~

不過果晚我都好開心呀~屋企人為我準備左好多野食，我家姐仲整個個blueberry chesse cake我食添，仲有就係阿姨、阿婆同埋Crystal都黎，我未試過屋企人同我慶祝生日連朋友都響度，仲要係舊曆既生日添~Crystal係未去過黃金海岸，所以佢由上環先入去屯門黃金海岸行下，食下tea，影下相，其實我自己都好耐無去過，入面多左好多野睇，我地仲去比人畫Q版人像，不過我個樣唔係好似，畫得靚左添，HAHA~

果日逗左幾封利是~哈!阿哥雖然未結婚，但係佢話諗唔到買咩比我，所以都封埋比我，佢封利是既餡仲係最大添~等佢生日既時候我都要買份勁大既禮物比佢先得!

我今年新曆生日，朋友們應該唔得閒，因為阿輝佢地飛左去台灣，Crystal又可能會返工，Elaine一定要湊仔，其他人......就算記得我生日，都未必得閒。但係....佢地會提早同我慶祝^.^，仲諗住去睇band show添，雖然聽講係會無乜人同埋會悶d，但係都未試過去，去下都無妨姐~不過Crystal都要問下嗰日有無搞呢d show，如果無既就唔會選擇去呢度，咁就要再諗過去邊喇~

今朝一瞓就瞓到10:30，一開手提就即係收到公司既電話，我同事話今朝好多人搵我，不過好彩，今朝剩係聽左兩次公司既電話，下晝就無~~不過聽日肯定大把野做!

無啦啦請人假又無乜野做，的確係幾無謂，不過...出旺角行街買衫就好，平日去到人都少左1/3，無咁逼，我好耐無試過平日出旺角，因為諗起個逼字都唔想行，所以今日都幾好既~~

買左d戰利品之後，我地就轉移地點，去行下Elements，咁啱我家姐同埋表弟放工都去果度，佢地話H&M有半價，所以我地就約埋一齊喇，不過佢地就去到先。
我地啱啱去到既時候，佢地已經行完，仲話無野啱買，無乜款，有半價既野又唔係好啱，無中環果間咁多野買，所以我同個fd都無入去行。

跟住我家姐話去買cup cake，兜左個商場一陣就搵到果間野"Petits"，點知入到去，一個小小既cup cake都要廿幾蚊，不過一世人一次，我家姐又咁想食，我地就買左兩個，4個人share。

我地坐響望住流冰場既凳度食，哈哈~買左呢兩個貴cake，我地好似響度糟塌佢咁，因為原本想一分為四，點知個cake一"連"就爛，最搞笑係....整到爛晒跟住我地又響度食，好似4個乞兒食餅碎咁~~~哈哈哈)))))真係笑死人~~不過其實試過之後，我諗都唔會再試，因為都其實唔係太過好食，同埋好甜~

今日既"特別假期"就咁告一段落，聽日繼續努力工作!!

而家仲請左假添，我地都唔知去邊好~而家諗住去玩d一日遊，不過暫時未搵到去邊，想去遊船河，但係而家天氣涼涼地，好似唔係好啱玩水，不過玩下好過浪費左一日假期~

雖然阿爸離開呢個世界已經1年，但係我諗返佢出事直至而家，仲感覺係剛發生無幾耐既事，突然有感而發，覺得時間真係唔等人，好多野真係要好好珍惜，好多野應該要睇化D，唔好咁執著，因為一生人既時間真係唔係好多~

阿爸，我永遠掛住您....

近排令我最唔開心既係，我呢兩日同老細嘈，因為我覺得自己無錯，所以同佢頂到衡~佢份人無乜事就無野，一有少少問題就鬧左人先，佢真係好無理取鬧，好偏心，好討厭! 兩日同佢嘈完自己都響度喊，因為我覺得自己好大壓力，自問自己無偷懶，博命做都得唔到好結果，仲覺得我係辦事不力咁，都唔知為乜，越黎越覺得心淡，原來盡左力都唔係好事，我而家只做好本份就算~做得多都無人會覺得啱~咁算囉~自此之後，我知道點做~想我再OT都幾難，無乜必要，都唔會再留響公司，做唔晒D野都無計，我得一對手，係做唔到就係做唔到~

最佳員工永遠只有識怕馬屁既人做到~所以我響老細心目中，可能係一個乜都肯做既員工，但唔係一個最佳員工~世態炎涼~我慢慢都諗化lu~~

近排令我最唔開心既係，我呢兩日同老細嘈，因為我覺得自己無錯，所以同佢頂到衡~佢份人無乜事就無野，一有少少問題就鬧左人先，佢真係好無理取鬧，好偏心，好討厭! 兩日同佢嘈完自己都響度喊，因為我覺得自己好大壓力，自問自己無偷懶，博命做都得唔到好結果，仲覺得我係辦事不力咁，都唔知為乜，越黎越覺得心淡，原來盡左力都唔係好事，我而家只做好本份就算~做得多都無人會覺得啱~咁算囉~自此之後，我知道點做~想我再OT都幾難，無乜必要，都唔會再留響公司，做唔晒D野都無計，我得一對手，係做唔到就係做唔到~

最佳員工永遠只有識怕馬屁既人做到~所以我響老細心目中，可能係一個乜都肯做既員工，但唔係一個最佳員工~世態炎涼~我慢慢都諗化lu~~

今日Manager仲問我要唔要一隻5、6歲既史立莎，我唔介意佢大年紀，我真係想要~我返到屋企借d倚同我媽咪講，不過佢reject左喇~我真係想養，但係無辦法啦~我又唔係日日響屋企~又真係難d既~~希望有好心人收養佢啦~

原來我好耐無見過Miss Fu , Miss Tse，我自已都唔覺，係尋晚Ms Tse同我講，我返新工咁耐都無見過~咁即係成年啦~我記返起對上一次佢地攪聚會我無黎到，因為我成8點幾仲響公司開OT，所以黎唔到，但係上次亞帆都有去，我就無去，而今次就我有去，佢就無去，每次同Miss聚會，唔係我唔得閒就佢唔得閒，我地應該真係無乜緣，哈哈~真係攪笑~

我地次次都打邊爐，終於今次唔係喇~去左置樂打冷~d野食就麻麻地啦~勝在係一間舖頭有冷氣涼囉~我覺得Miss Tse好關心我，因為我地咁耐無見，佢都問我返工辛唔辛苦，會唔會好似許留山咁，開OT開到好夜，D同事夾唔夾等等，令到我覺得好Warm，又令我醒起我嗰陣響許留山要走既日子，都係約左Miss出黎打邊爐，Miss 佢地問到我返工點樣既時候，因為工作壓力太大，又唔捨得D同事，我竟然響咁多人面前忍唔住喊，諗返都醜死，勁核突~~

食完飯個個散Band，我同亞欣亞輝就想傾下計，同埋阿輝生日，少少地請佢地食個糖水補下數~最後去左滿記食糖水~亞輝話間野黑炆炆咁~我就話因為有曱甴都唔覺丫嘛~佢就講左個好好笑既經歷我知~就係有次佢同阿欣去糖水舖食西瓜西米露，食晒d西瓜就見到隻烏蠅~比個d人換，個d人以為係佢食晒d西瓜，之後飛隻烏蠅落去~
好核突，但係好好笑~

 其實我地今次聚會講緊一齊去旅行、再唔係就去珠海、之後講講下返左香港，去梅窩住一晚，anyway有得玩，又有聚下去邊都好啦~我都好想去下戶外活動，更何況一班人點都會開心。雖然講話係星期六日，但唔係個個人星期六都會唔使返工，至少我暫時都要返學啦~不過放左學唔怕夜都ok既，但係都無意思~即係玩得1日~只不過都係plan左至算lu~

我地做姊妹既都去左婚妙舖試裙，諗返之前三家姐結婚，都係咁樣~不過果陣間婚紗舖d裙，著到我好老即~，可能係款既問題~所以今次我揀左幾條young d既款，多數揀左短裙~但係呢間都唔係好多款揀，短裙就更少，點知試左3條...1條就短得滯，著到好似美女廚房咁，1條個款就好dry，1條就斯文大個女得滯~之後唯有再試返d長裙，試左1條既顏色係淺粉紅色吊帶，下面就一層層好有層次感既紗紗裙~不過下面咁多層次，又大舊又厚同埋都好重下~其實我之前諗住反正都試，又睇到咁靚，咪著黎玩下，玩完過下癮就算~點知試左個個都話ok，個款又young，連幫我試衫d姐姐仔都話襯返我膚色。不過我鍾意還鍾意，我驚咁多個姊妹最突出唔係咁好~不過佢地話唔會，都唔係太誇張，d姐姐仔就話係主人家果邊，所以都無乜問題，到最後都係揀返呢條~原來試裙都試左幾個鐘，又除又著都咪話唔攰，難怪家姐之前去影相都話仲攰過返工~但係我就覺得影完出黎既效果咁好~辛苦極都抵返啦~

我啱啱貼返靚部NDS~~

好彩我返到公司，個同事話無野，幾好睇咋~~我幾驚好怪呀~

呢幾晚我都係點幾兩點先瞓~心情已經唔好~仲攪到成個人無晒精神咁~
尋晚同我替佢個位既同事傾開，我講我d唔開心既野比佢聽，原來我發覺我d朋友仔比我既意見，女仔同男仔係有少少分別架~佢比我個意見反而係覺得我唔知想點~不過~其實到最終佢地我安慰說話既意思其實同我d姊妹意思一樣~"唔好諗，唔好諗埋d無謂野，越諗得差就會更差，諗完盞自已唔開心~"

(閱讀全文)