響而家做緊呢間公司係第一次有活動攪，仲攪左去澳門添。

星期六匆匆忙忙咁收工，我就大把野未做完就要熄電腦，成張枱d野都未執就趕住走，我地今次去澳門就坐新開既船，響氹仔落船架~不過架船係新同埋闊，不過我覺得個座位一d都唔好坐，想訓都訓唔到。

去到氹仔仲諗住可以去氹仔食野掃街，點知，佢地大部份人都鍾意去賭場，成日掛住賭，一過左關就去威尼斯人，仲有得半日時間，真係唔係好夠時間，我地呢個旅程首先每人夾一千，將其中三千攞黎博一鋪，就博到返黎，就嬴個飯錢返黎!我就唔係太鍾意賭，又唔識，但係個個都玩，所以自己都攞左五百出黎玩百家樂，嬴下輸下咁，原本輸淨二百，跟住我就將呢二百比我經理幫我玩，搭佢一齊落注，一百一百咁嬴返，最後就嬴左一百就算lu，就將呢一百買手信。

之後去左媽閣廟附近出名既船屋葡國餐廳食晚飯，不過我就覺得除左海鮮湯+豬仔包好味之外，全部都麻麻地，仲特登訂左隻燒乳豬，以為有幾好食，點知都係得個咸字，中式乳豬好味好多~~全餐d野都勁咸，認真麻麻地~

食完餐飯就9點幾，當然係買下手信啦~買完手信......又係賭......佢地真係好爛賭，我諗佢地黎既主要目的十成係想"賭"，去到經過永利，不過無入去，響門口有個好大既噴水池，原來噴到好高，仲曉噴火，加埋d music都幾靚幾好睇。

睇完就去左Sands，去到就要買左Turbo Jet船飛返HK，佢地原本想買3:00am，我同個同事都唔想玩咁耐，又唔係出去玩，響度咁多個鐘都係賭，悶死攰死眼訓死，所以我地就想搭11:30pm走，不過最終原來只有11:40pm同埋尾班12:15am，無謂爭少少就分開走，所以我地齊齊買尾班飛。

呢個賭場入面超焗，無冷氣咁，我同個同事唔想再賭，就去左睇下d人跳舞，跟住就去玩老虎機無咁悶，我就入左一百蚊玩，禁左幾次就贏左6百幾，勁開心，但係剛剛先開始，有排都未走得，所以繼續玩，變返4百幾，之後玩玩下又有Jetpo 8次，哈哈~~~又羸返5百幾，我當然見好就收，就攞錢無玩lu，我完全無諗過玩老虎機都會嬴錢，由一百變5百幾，我諗住攞一百出黎玩下就算，因為我從來玩老虎機都無嬴錢，我真係超開心，果日總共羸6百幾，即係除左買手信唔使出錢之外，船飛都嬴返黎，人地話第一次賭既人多數都嬴，因為d爛賭鬼唔認得你，哈哈~我覺得我果日好好彩，下次我諗無咁好彩~雖然幾百蚊唔係多，不過由無變有，都已經好好，起碼呢個旅程即係唔使錢~

我終於都明白點解d人咁爛賭，因為個吸引力好大，講真，我今次有d運，我都想下次再去玩下，不過，人唔會成日咁好運，我覺得嬴同輸都好易~我下次玩都一樣會比個底線自己，諗住攞一個金額玩，有既就當然好，無既咪當玩下囉~去博下船飛返黎已經夠~

今日係我既舊曆生日，提早左響尋日慶祝，唔知點解就算屋企人同我慶祝，我都唔係好覺我自己生日，可能係舊曆卦，不過我始終覺得生日都係無乜特別要慶祝，好似年年都係差唔多咁，更何況我"不想長大"，人越大就越黎越無咁多人錫，同埋一年比一年大，好似自己吃喝玩樂既時間都少d咁~不過始終人都會大，唯有而家盡情d去玩，呢一刻對我黎講，我生日既日子=多d時間同朋友聚會，都係開心下姐~

不過果晚我都好開心呀~屋企人為我準備左好多野食，我家姐仲整個個blueberry chesse cake我食添，仲有就係阿姨、阿婆同埋Crystal都黎，我未試過屋企人同我慶祝生日連朋友都響度，仲要係舊曆既生日添~Crystal係未去過黃金海岸，所以佢由上環先入去屯門黃金海岸行下，食下tea，影下相，其實我自己都好耐無去過，入面多左好多野睇，我地仲去比人畫Q版人像，不過我個樣唔係好似，畫得靚左添，HAHA~

果日逗左幾封利是~哈!阿哥雖然未結婚，但係佢話諗唔到買咩比我，所以都封埋比我，佢封利是既餡仲係最大添~等佢生日既時候我都要買份勁大既禮物比佢先得!

我今年新曆生日，朋友們應該唔得閒，因為阿輝佢地飛左去台灣，Crystal又可能會返工，Elaine一定要湊仔，其他人......就算記得我生日，都未必得閒。但係....佢地會提早同我慶祝^.^，仲諗住去睇band show添，雖然聽講係會無乜人同埋會悶d，但係都未試過去，去下都無妨姐~不過Crystal都要問下嗰日有無搞呢d show，如果無既就唔會選擇去呢度，咁就要再諗過去邊喇~

原本今日特登請假去Disney，而家無得去，又請埋假，所以同個fd去行下旺角同埋新商場Elements。

今朝一瞓就瞓到10:30，一開手提就即係收到公司既電話，我同事話今朝好多人搵我，不過好彩，今朝剩係聽左兩次公司既電話，下晝就無~~不過聽日肯定大把野做!

無啦啦請人假又無乜野做，的確係幾無謂，不過...出旺角行街買衫就好，平日去到人都少左1/3，無咁逼，我好耐無試過平日出旺角，因為諗起個逼字都唔想行，所以今日都幾好既~~

買左d戰利品之後，我地就轉移地點，去行下Elements，咁啱我家姐同埋表弟放工都去果度，佢地話H&M有半價，所以我地就約埋一齊喇，不過佢地就去到先。
我地啱啱去到既時候，佢地已經行完，仲話無野啱買，無乜款，有半價既野又唔係好啱，無中環果間咁多野買，所以我同個fd都無入去行。

跟住我家姐話去買cup cake，兜左個商場一陣就搵到果間野"Petits"，點知入到去，一個小小既cup cake都要廿幾蚊，不過一世人一次，我家姐又咁想食，我地就買左兩個，4個人share。

我地坐響望住流冰場既凳度食，哈哈~買左呢兩個貴cake，我地好似響度糟塌佢咁，因為原本想一分為四，點知個cake一"連"就爛，最搞笑係....整到爛晒跟住我地又響度食，好似4個乞兒食餅碎咁~~~哈哈哈)))))真係笑死人~~不過其實試過之後，我諗都唔會再試，因為都其實唔係太過好食，同埋好甜~

今日既"特別假期"就咁告一段落，聽日繼續努力工作!!

好失望好唔開心呀，原本已經confirm左10月26號可以有人帶入Disney，嗰日係星期五，可以玩到11:00pm，我仲鬼咁開心，同老細請定假入去玩，點知....尋日收到最新消息係Disney下令唔可以用員工飛入去玩，唉....一心諗住入去影相，睇好有型既阿Jack花車都唔得~真係極度失望呀!唯有等halloween過左先啦~

而家仲請左假添，我地都唔知去邊好~而家諗住去玩d一日遊，不過暫時未搵到去邊，想去遊船河，但係而家天氣涼涼地，好似唔係好啱玩水，不過玩下好過浪費左一日假期~

今日係阿爸既死忌，我上個月都仲突然記得阿爸係上年10月份離開我地，可能自己呢排好忙，唔經唔覺，原來已經一年，我自己都唔記得阿爸今日係死忌，係婷婷姐晏晝MSN我話知我先記得農曆8月24，真係覺得自己有D對唔住阿爸，其實雖然響生活上已經習慣左無阿爸響度，但係好多時響腦海度仍然會浮現佢個影像出黎，有時會響度諗"阿爸響度唔知會點呢...?"，哈!真係有D傻.....

雖然阿爸離開呢個世界已經1年，但係我諗返佢出事直至而家，仲感覺係剛發生無幾耐既事，突然有感而發，覺得時間真係唔等人，好多野真係要好好珍惜，好多野應該要睇化D，唔好咁執著，因為一生人既時間真係唔係好多~

阿爸，我永遠掛住您....

展會終於都過去左，但係都仲係咁忙咁多野做，唉....因為個個都搵我，事無大小都係搵我，連公司部電腦上唔到網都係問我，都係我問題咁~我係神仙咩~一日做野得八個鐘，我都唔知做乜先~

近排令我最唔開心既係，我呢兩日同老細嘈，因為我覺得自己無錯，所以同佢頂到衡~佢份人無乜事就無野，一有少少問題就鬧左人先，佢真係好無理取鬧，好偏心，好討厭! 兩日同佢嘈完自己都響度喊，因為我覺得自己好大壓力，自問自己無偷懶，博命做都得唔到好結果，仲覺得我係辦事不力咁，都唔知為乜，越黎越覺得心淡，原來盡左力都唔係好事，我而家只做好本份就算~做得多都無人會覺得啱~咁算囉~自此之後，我知道點做~想我再OT都幾難，無乜必要，都唔會再留響公司，做唔晒D野都無計，我得一對手，係做唔到就係做唔到~

最佳員工永遠只有識怕馬屁既人做到~所以我響老細心目中，可能係一個乜都肯做既員工，但唔係一個最佳員工~世態炎涼~我慢慢都諗化lu~~

展會終於都過去左，但係都仲係咁忙咁多野做，唉....因為個個都搵我，事無大小都係搵我，連公司部電腦上唔到網都係問我，都係我問題咁~我係神仙咩~一日做野得八個鐘，我都唔知做乜先~

近排令我最唔開心既係，我呢兩日同老細嘈，因為我覺得自己無錯，所以同佢頂到衡~佢份人無乜事就無野，一有少少問題就鬧左人先，佢真係好無理取鬧，好偏心，好討厭! 兩日同佢嘈完自己都響度喊，因為我覺得自己好大壓力，自問自己無偷懶，博命做都得唔到好結果，仲覺得我係辦事不力咁，都唔知為乜，越黎越覺得心淡，原來盡左力都唔係好事，我而家只做好本份就算~做得多都無人會覺得啱~咁算囉~自此之後，我知道點做~想我再OT都幾難，無乜必要，都唔會再留響公司，做唔晒D野都無計，我得一對手，係做唔到就係做唔到~

最佳員工永遠只有識怕馬屁既人做到~所以我響老細心目中，可能係一個乜都肯做既員工，但唔係一個最佳員工~世態炎涼~我慢慢都諗化lu~~

呢個月響公司真係好多野做，平時跟單已經不嬲都要做，會計部放大假，要做埋佢果份，shipping又要做埋，呢個月仲有幾單貨入口要跟，8月28號公司又有展覽會，跟住有乜事個個都搵我，我得返4日時間攪展覽會要準備既野，但係...我都仲未攪掂，好怕趕唔切~唉.......救命呀~~我又有功課要交，但係日日都響公司OT，想早d返屋企做下功課都無乜時間，而家學期尾有份佔80%分數既功課，要呢個星期六交，但係我完全唔識，弊喇~所以希望快d順利渡過呢個月，同事又返黎、展覽會攪完、功課又交埋，咁就一天都光晒~~

今日Manager仲問我要唔要一隻5、6歲既史立莎，我唔介意佢大年紀，我真係想要~我返到屋企借d倚同我媽咪講，不過佢reject左喇~我真係想養，但係無辦法啦~我又唔係日日響屋企~又真係難d既~~希望有好心人收養佢啦~

忙忙忙忙忙忙忙忙忙忙忙忙忙忙忙忙忙...........
呢排好忙.......
無時間寫blog........
勁忙..........................
忙到連吊頸都無時間..........
好慘....................................